గర్భిణులు, ప్రమాద బాధితులకు మెరుగైన వైద్యం అందించాలి
ఆమనగల్లు, అక్టోబర్ 30 :విషజ్వరాల నియంత్రణకు ముందస్తు చర్యలు చేపట్టాలి: డా. కళ్యాణ్ చక్రవర్తి ప్రభుత్వ ఆసుపత్రులకు వచ్చే రోగులకు నాణ్యమైన వైద్య సేవలు అందించాలని, విధుల నిర్వహణలో నిర్లక్ష్యం వహించకూడదని రంగారెడ్డి జిల్లా వైద్య ఆరోగ్యశాఖ అధికారి డా. కళ్యాణ్ చక్రవర్తి వైద్య సిబ్బందికి సూచించారు. రాష్ట్ర వైద్య ఆరోగ్యశాఖ మంత్రి డా. దామోదర రాజనర్సింహ, కల్వకుర్తి ఎమ్మెల్యే కసిరెడ్డి నారాయణరెడ్డి ఆదేశాల మేరకు గురువారం ఆమనగల్లు పట్టణంలోని ప్రభుత్వ ప్రాథమిక ఆరోగ్య కేంద్రాన్ని ఆయన ఆకస్మికంగా తనిఖీ చేశారు.
ఈ సందర్భంగా ఆసుపత్రిలోని వివిధ విభాగాలను పరిశీలించి, సిబ్బంది హాజరు, మందుల నిల్వలు, రోగులకు అందుతున్న వైద్య సేవలు, రికార్డుల నిర్వహణపై సమీక్ష నిర్వహించారు. ప్రభుత్వ ఆసుపత్రులు ప్రజలకు మెరుగైన వైద్య సేవలు అందించేలా వైద్యులు, సిబ్బంది సమయపాలన పాటిస్తూ బాధ్యతాయుతంగా విధులు నిర్వహించాలని ఆయన పేర్కొన్నారు.
రికార్డుల నిర్వహణపై సమీక్ష
ఆసుపత్రి సూపరింటెండెంట్ డా. నాగరాజు, వైద్యాధికారి డా. ఊర్మిళ, ఆరోగ్య విస్తరణ అధికారి తిరుపతి రెడ్డి, నర్సింగ్ అధికారులు జ్యోతి మేరీ, కృష్ణలీల, దేవేందర్, డీపీఎంవో చంద్రశేఖర్ రెడ్డితో డీఎంహెచ్‌వో సమీక్షించారు.
ఆసుపత్రిలో నమోదైన విషజ్వరాల కేసులు, రోగులకు అందించిన చికిత్స వివరాలను అడిగి తెలుసుకున్నారు. గర్భిణుల నమోదు, అధిక ప్రమాద గర్భిణుల వివరాలు, వైద్య పరీక్షల రికార్డులు, ప్రయోగశాల సేవలు, మందుల పంపిణీ, టీకాల నిల్వలను పరిశీలించారు. క్షయ, కుష్ఠు వ్యాధుల రిజిస్టర్లు, ఈ-ఆరోగ్యం వివరాలు, అసాంక్రమిక వ్యాధుల నమోదు, హెచ్‌పీవీ టీకాలు, తల్లి-శిశు ఆరోగ్య సేవలు, బాహ్య, అంతర్గత రోగుల విభాగాల పనితీరును సమీక్షించి అవసరమైన సూచనలు చేశారు.
విషజ్వరాలపై అప్రమత్తంగా ఉండాలి
మలేరియా, టైఫాయిడ్, డెంగ్యూ వంటి జ్వరాలతోపాటు శ్వాసకోశ, ఇతర సీజనల్ వ్యాధులు ప్రబలకుండా ముందస్తు చర్యలు తీసుకోవాలని డా. కళ్యాణ్ చక్రవర్తి సూచించారు. జ్వరంతో వచ్చే రోగులకు అవసరమైన పరీక్షలు నిర్వహించి తగిన చికిత్స అందించాలని ఆదేశించారు.
పాము కాటు, కుక్క కాటు, కోతి కాటుకు సంబంధించిన మందులు, వ్యాక్సిన్ల నిల్వలను పరిశీలించి, అత్యవసర సమయాల్లో రోగులకు తక్షణ చికిత్స అందేలా వాటిని అందుబాటులో ఉంచాలని తెలిపారు.
గర్భిణులు, ప్రమాద బాధితులకు ప్రాధాన్యం
గర్భిణులకు క్రమం తప్పకుండా వైద్య పరీక్షలు నిర్వహించాలని, అధిక ప్రమాద గర్భిణులను గుర్తించి ప్రత్యేక పర్యవేక్షణలో ఉంచాలని డీఎంహెచ్‌వో సూచించారు. ప్రసవ సేవలు, తల్లి-శిశు ఆరోగ్య సేవలను మెరుగుపరచాలని తెలిపారు. రోడ్డు ప్రమాదాల్లో గాయపడిన వారికి సకాలంలో చికిత్స అందించడంతోపాటు అత్యవసర వైద్య సేవలు, ట్రామా కేర్‌పై ప్రత్యేక శ్రద్ధ చూపాలని ఆదేశించారు.
నూతన ఆసుపత్రి భవన పనుల పరిశీలన
అనంతరం ప్రభుత్వ ఆసుపత్రి నూతన భవన నిర్మాణ పనులను డా. కళ్యాణ్ చక్రవర్తి పరిశీలించారు. మిగిలిన అసంపూర్తి పనులను త్వరగా పూర్తి చేసి, మరో నెల నుంచి రెండు నెలల్లో భవనాన్ని ప్రజలకు అందుబాటులోకి తీసుకువచ్చేలా చర్యలు చేపట్టాలని సంబంధిత అధికారులకు సూచించారు. ఆధునిక సదుపాయాలతో ఆసుపత్రిని అభివృద్ధి చేసి ఆమనగల్లు, పరిసర ప్రాంతాల ప్రజలకు మెరుగైన వైద్య సేవలు అందించడమే లక్ష్యమని పేర్కొన్నారు.
ఈ తనిఖీలో జిల్లా ప్రోగ్రాం అధికారి అక్రమ్, ఆరోగ్య విస్తరణ అధికారి తిరుపతి రెడ్డి, ల్యాబ్ టెక్నీషియన్ వేణు, నర్సింగ్ అధికారులు జ్యోతి మేరీ, కృష్ణలీల, దేవేందర్, వైద్య సిబ్బంది మునీరా, శ్రీను, రమేష్, దస్లీ, సుశీల తదితరులు పాల్గొన్నారు